DON PEPPO 'O PIZZAIULO

DON PEPPO ‘O PIZZAIUOLO

Don Peppo, ‘o pizzaiuolo arreta ‘o vico,

ha perze tutte ‘e cliente

e nun tene manco cchiù n’amico.

‘E  sere all’inverno appiccia ‘o furno,

ma sulamente per se scarfà.

Cerca ‘e sparagnà pure ‘ngoppa

‘o lignammo c’arde dint’ò furno.

‘E maligne vanno ricenno

ca’ usa pure ‘e cascie ‘e muorte

pe’ fa ‘o furno allummà.

Pure pe’ sparagnà accatta

‘a robba fracete da ra’ ‘a magnà.

Oramaie s’è sparza ‘a voce

dint’ò rione e pe’ tutto ‘o quartiere,

c’à pizza e don Peppo ‘o pizzaiulo

è arroventata overamente pazza.

Nun se sente cchiù addore bello

‘e mare r’alice fresca ‘e paranzella,

o addora ra’ pummarola fresca

appena coveta e ‘a muzzarella

ma ‘nu fetore e saraca fraceta

scurdate nu’ mese intero dint’à tiella.

Pure ‘a farina pe’ affà ‘a pasta,

meza ‘mbagliucculata e fraceta,

fete a tale punto che t’ara appilà ‘o naso.

Nun parlammo poi d’ò magazzino,

ca’ nun canosce ‘a pulizzia ogne matina.

Fete ogne cose dint’à  sta pizzaria,

 ca’ l’autr’iere,  ‘e notte, tre guagliuncielle,

hanno curretto  l’inzegna ca’ steva

‘ngoppa ‘a porta ammiezz’a via.

Hanno cagnato sulamente ‘a “i” ca’ “ u”:

e ‘o posto ‘e leggere “pizzaria”

chiaramente se leggeva “puzzaria”.

Catello Nastro

*******

p.s. A Napoli la pizza è ottima in tutte le pizzerie per la concorrenza ed è pure economica per…la recessione.

La pizza rimane sempre la regina dell’arte culinaria napoletana e Campana in genere.